ကျောက်ကပ်အားနည်းသူများအတွက် သတိထားရမည့် အစားအစာများ
ကျောက်ကပ်ရောဂါရှိသူများအတွက် အစားအစာရွေးချယ်မှုသည် အလွန်အရေးကြီးပါသည်။ ကျန်းမာရေးနှင့်ညီညွတ်သော အစားအစာသည် ကျောက်ကပ်အား ပိုမိုထိခိုက်မှုမှ ကာကွယ်ပေးပြီး ရောဂါအခြေအနေပိုဆိုးမလာအောင် တားဆီးပေးနိုင်ပါသည်။
ကျောက်ကပ်ရောဂါရှိသူများအတွက် အဓိကထား၍ ဂရုစိုက်ရမည့် အချက်များမှာ ပရိုတင်း၊ ဆိုဒီယမ်၊ ပိုတက်ဆီယမ် နှင့် ဖော့စဖရပ်စ် တို့ဖြစ်ပါသည်။
၁။ ပရိုတင်း ကျောက်ကပ်ရောဂါရှိသူများတွင် ပရိုတင်းဓာတ်ကို လျှော့စားရန်လိုအပ်ပါသည်။ အဘယ်ကြောင့်ဆိုသော် ပရိုတင်းဓာတ်များသည့်အခါ ကျောက်ကပ်ကို ပိုမိုအလုပ်လုပ်စေပြီး ထိခိုက်စေနိုင်သောကြောင့်ဖြစ်သည်။
· ပရိုတင်းဓာတ်ကို လုံးဝမစားဘဲမနေသင့်ပါ။ အရည်အသွေးကောင်းသော ပရိုတင်းဓာတ်ကို နည်းနည်းစီ စားသုံးပေးသင့်ပါသည်။
· ဥအမျိုးမျိုး၊ ငါး၊ အဆီမပါသောအသားများ စသည့် အရည်အသွေးကောင်းပရိုတင်းများကို ရွေးချယ်စားသုံးပါ။
၂။ ဆိုဒီယမ် (ဆား) ဆိုဒီယမ်ဓာတ်များပါက ခန္ဓာကိုယ်တွင်ရေများစုပြီး ဖောရောင်ခြင်း၊ သွေးတိုးခြင်းများဖြစ်စေနိုင်သည်။ ထို့ကြောင့် ဆားကိုလျှော့စားရန်အရေးကြီးပါသည်။
· ဟင်းချက်ရာတွင် ဆားကိုလျှော့ထည့်ပါ။
· ဆားငန်သောအစားအစာများ (ငါးပိ၊ ငါးခြောက်၊ ငံပြာရည်၊ အချို့သောအသားလုံးများ) ကိုရှောင်ပါ။
· ဆားဓာတ်များသော အသင့်စားအစားအစာများ၊ အေးခဲအစားအစာများ၊ စည်သွပ်ဘူးများကို ရှောင်ပါ။
၃။ ပိုတက်ဆီယမ် ပိုတက်ဆီယမ်ဓာတ်များပါက နှလုံးခုန်မမှန်ခြင်းကိုဖြစ်စေနိုင်သည်။
· ပိုတက်ဆီယမ်ဓာတ်များသော အသီးအနှံများ (ငှက်ပျောသီး၊ သရက်သီး၊ လိမ္မော်သီး၊ အာလူး၊ ခရမ်းချဉ်သီး) ကိုလျှော့စားပါ။
· ဟင်းသီးဟင်းရွက်များကို သေးငယ်သောအပိုင်းများဖြတ်၍ ရေစင်အောင်ဆေးပြီး ပြုတ်ပါက ပိုတက်ဆီယမ်ဓာတ်ကိုလျှော့ချနိုင်သည်။
၄။ ဖော့စဖရပ်စ် ဖော့စဖရပ်စ်ဓာတ်များပါက အရိုးများကိုအားနည်းစေပြီး သွေးကြောများကိုမာစေနိုင်သည်။
· နို့နှင့်နို့ထွက်ပစ္စည်းများ၊ ပဲအမျိုးမျိုး၊ အာလူး၊ ဆိုဒါပါသောအချိုရည်များ စသည်တို့ကိုလျှော့စားပါ။
အခြားသောအချက်များ
· ရေကို လိုအပ်သလောက်သာသောက်ပါ။ ကျောက်ကပ်ရောဂါအဆင့်ပေါ်မူတည်၍ ဆရာဝန်ညွှန်ကြားသည့်အတိုင်း ရေသောက်သုံးပါ။
· အချို့သောဆေးများနှင့် ဓာတ်ပြုနိုင်သောကြောင့် ဆေးဖက်ဝင်အပင်များ၊ ဖြည့်စွက်စာများကို ဆရာဝန်နှင့်တိုင်ပင်ပြီးမှသာသောက်သုံးပါ။
အရေးကြီးသောအချက် ကျောက်ကပ်ရောဂါရှိသူတိုင်းသည် တစ်ဦးနှင့်တစ်ဦး ရောဂါအခြေအနေမတူညီကြပါ။ ထို့ကြောင့် မိမိနှင့်သင့်တော်သော အစားအစာပုံစံကို ဆရာဝန် (သို့မဟုတ်) အာဟာရဆရာဝန်နှင့် တိုင်ပင်ဆွေးနွေးပြီး စားသုံးသင့်ပါသည်။
ကျောက်ကပ်ရောဂါရှိသူများအနေဖြင့် အထက်ဖော်ပြပါအချက်များကို ဂရုစိုက်ခြင်းဖြင့် ရောဂါကြောင့်ဖြစ်ပေါ်လာနိုင်သော ဆိုးကျိုးများကို လျှော့ချနိုင်မည်ဖြစ်ပါသည်။
